تحریر: عامر ہاشم خاکوانی

 کیا آپ جانتے ہیں کہ پاکستان کی پچھتر سالہ تاریخ میں سپریم کورٹ پر ایک ہی بار فزیکل حملہ کیا گیا، جب ایک سیاسی جماعت کے سینکڑوں کارکنوں نے سپریم کورٹ پر ہلہ بول دیا اور چیف جسٹس سمیت دیگر ججوں کو بھاگ کر ریٹائرنگ روم میں پناہ لینا پڑی اور وہاں سے وہ بمشکل نکل پائے ورنہ ہجوم کے ہاتھ زخمی ہوجاتے ۔ 

  وہ جماعت مسلم لیگ ن ہے۔ یہ واقعہ انیس سو ستانوے کا ہے جب وزیراعظم نواز شریف تھے اور شہباز شریف وزیراعلیٰ پنجاب، چیف جسٹس سجاد علی شاہ تھے۔ 

    کیا آپ جانتے ہیں کہ پاکستان کی عدالتی تاریخ میں صرف ایک واقعہ ایسا ہے جب وزیراعظم کے خصوصی مشیر نے لاہور ہائی کورٹ کے چیف جسٹس اور ایک اور جج کو فون کر کے کہا کہ وزیراعظم کے مخالف سیاستدان کو فوری سزا سنائی جائے۔ 

  وہ فون ٹیپ ہوگیا اور بعد میں منظر عام پر آنے پر ان دونون ججوں کو استعفا دینا پڑا۔ 

  جی اس واقعے میں بھی ن لیگ ملوث تھی۔ سیف الرحمن فون کرنے والا تھا جبکہ ملک قیوم اور ایک اور جج کو استعفا دینا پڑا تھا۔ 

   کیا آپ جانتے ہیں کہ ایک پارٹی کے سربراہ کی اسمبلی توڑی گئی اور پھر بحال ہوئی اور پھر بحال کرنے والے ججوں کے بارے میں اس وقت کی اپوزیشن لیڈر جو ایک سابق وزیراعظم بھی تھیں، انہوں نے بیان دیا کہ (پیسے کی )چمک کام دکھا گئی۔ 

  جی وہ بھی ن لیگ کے وزیراعظم نواز شریف تھے۔ وہ واحد ایسے خوش نصیب سیاستدان ہیں جن کی توڑی ہوئی اسمبلی بحال کی گئی۔ اسے جسٹس نسیم حسن شاہ نے بحال کیا تھا، جن پر ن لیگ کے طرفدار ہونے کا الزام لگایا جاتا ہے ۔ 

   کیا آپ جانتے ہیں کہ ایک بڑی جماعت کے سربراہ اور وزیراعظم کے خلاف سپریم کورٹ کارروائی کر رہی تھی، اچانک ایسا جادو چلا کہ سپریم کورٹ منقسم ہوگئی اور بعد مین وہ مخالف چیف جسٹس ہی کو جانا پڑا۔ بعد میں کہا گیا کہ اس وزیراعظم کے اشارے میں ایک سابق جج بریف کیس لے کر کوئٹہ گئے اور جوڑ توڑ کیا۔ 

  کیا آپ جانتے ہیں کہ اس سابق جج کو بعد میں حیران کن طور پر صدر مملکت بھی بنایا گیا۔ ان کا نام رفیق تارڑ تھا ، وہی جن کا نواسا عطا تارڑ آج کل ن لیگ کا کرتا دھرتا رہنما ہے۔ 

  جبکہ وہ وزیراعظم بھی نواز شریف تھا۔ 

   کیا آپ جانتے ہیں کہ ایک سابق وزیراعظم کو صڑف پچاس روپے کے سٹامپ پیپر پر ایک خالی خولی یقین دہانی کے بعد باہر جانے دیا گیا اور وہ پچھلے ساڑھے تین برسوں سے واپس نہیں لوٹا۔  تب حکومت نے عدالت کو کہا تھا کہ اس سے چند ارب یا چلیں کروڑوں کا بانڈ بھروائیں، واپس نہیں آئے گا۔ عدالت نے ایسا نہ کیا اور وہ سابق وزیراعظم آج لندن میں بیٹھا مزے سے کافی پیتا ، آئس کریمیں کھاتا گھومتا پھرتا ہے اور ایک بار بھی اپنی اس نام نہاد پیچیدہ بیماری کے علاج کے لئے ہسپتال داخل نہین ہوا۔ 

 جی اس کا نام نواز شریف ہے۔ 

  کیا آپ جانتے ہیں کہ صرف دو ڈھائی سال پہلے ایک سابق وزیراعظم کے بھتیجے اور سابق وزیراعلیٰ کے بیٹے کی ضمانت ایک جج صاحب نے اتوار کے روز لے لی اور ہرگز یہ نہیں کہا کہ حفاظتی ضمانت کے لئے ملزم کو عدالت میں پیش ہونا ضروری ہے۔ 

  جی وہ ملزم حمزہ شہباز شریف تھا۔ ضمانت لینے والے لاہور ہائی کورٹ کے سابق چیف جسٹس قاسم خان تھے۔ وہی صاحب جو ن لیگ کے چہیتے رہے ۔ 

 کیا آپ جانتے ہیں کہ انہی جسٹس قاسم خان صاحب نے احتساب عدالت کے ریٹائر ہوجانے والے ججوں کی جگہ نئے جج تعینات نہ کئے، مہینوں تک وہ سیٹیں خالی رہیں، عدالت میں کیسز آگے نہ بڑھے اور پھر اسی بات کو بنیاد بنا کر ان ملزموں (جی وہ سب ن لیگی لیڈر تھے ) کی ضمانت لے لی کہ نیب ان کے خلاف کارروائی نہیں کر رہی اور یہ کئی ماہ سے اسیر ہیں۔ نیب چیختی چلاتی رہی کہ ان ججوں کو آپ نے مقرر کرنا تھا، اگر نہیں کئے اور وہ عدالتیں خالی تھیں تو اس میں ہمارا کیا قصور۔ 

   کیا آپ جانتے ہیں کہ لاہور ہائی کورٹ کا ایک سابق چیف جسٹس ایسا بھی تھا جس نے نوے کے عشرے میں ن لیگ سے کونسلر کا الیکشن لڑا۔ ن لیگ نے اسے ہائی کورٹ کا جج بنادیا اور وہ بعد میں خاصا عرصہ چیف جسٹس بھی رہا۔ ان کانام خواجہ شریف تھا۔ 

  جی صاحبو! یہ صرف چند مثالیں ہیں۔ ایسی بے شمار مثالیں اور بے شمار واقعات موجود ہیں۔ اتنے کہ بہت سے لکھے نہیں جا سکتے، زبانی سنائے جا سکتے ہیں۔ بعض لکھتے لکھتے میں تھک جائوں گا۔ جس سابق چیف جسٹس نے اسمبلی بحال کی تھی، اس کا ایک حیران کن واقعہ ایسا ہے کہ لکھوں تو یقین نہیں آئے گا۔ چلیں رہنے دیتے ہیں۔ کبھی ملاقات ہوئی تو زبانی بتائوں گا۔ راوی اس کا ن لیگ کا نہایت سینئر اور معتبر حامی صحافی ہے۔

   آج جب مریم نواز شریف چیخ چیخ کر جلسوں میں جھوٹے الزامات لگاتیں اور صاف جھوٹ بولتی ہیں تو ہنسی آتی ہے۔ 

  اتنی نہ بڑھا پاکی داماں کی حکایت 

  دامن کو زرا دیکھ زرا بند قبا دیکھ  

والا شعر سنانے کو جی چاہتا ہے

خان کبھی مقتدر حلقوں کی پہلی چوائس نہیں تھا!!

اگر نواز شریف 13 جولائی کو مریم نواز کے ساتھ لاہور نا آتا  تو شہباز شریف ہی 2018 میں  وزیراعظم ہوتا- وہی شہباز شریف جو ریلی کو لاہور کی گلیوں میں گھماتا رہا اور ائر پورٹ نہ پہنچا۔

نواز شریف کو جیل بھیجنا پڑا اور خان کو وزیراعظم کے طور پر لانا پڑا۔ تب بھی کوشش کی گئی کہ پنجاب ن لیگ کو دیا جائے مگر خان ڈٹ گیا کہ یہ نہیں تو وہ بھی نہیں!

وہ علیحدہ بات کہ آپس کی چپقلش میں ہمیں بزدار کا تحفہ ملا جو بالآخر وہ طوطا ثابت ہوا جس میں خان کی جان تھی اور پیرنی کا استخارہ ٹھیک نکلا کہ جب تک بزدار ہے تبھی تک خان بھی وزیراعظم ہے!

مقتدرہ نے خان کو فل سپورٹ کیا!

یہ کوئی معجزہ نہیں تھا، کیانی کی اسی پالیسی کا تسلسل تھا کہ جمہوری حکومت کے پیچھے کھڑے ہونا ہے جب تک وہ ریڈ لائن نہ کراس کرے۔ اسی پالیسی کے تحت اٹھارویں ترمیم بھی برداشت کر لی گئی اورآج بھی ڈی جی ببانگ دہل فرماتے ہیں کہ اس ملک میں کبھی مارشل لا نہیں لگے گا!

بہرحال خان آگیا، لیکن چل نہیں رہا تھا- گورننس نظر نہیں آرہی تھی، بزدار اور محمود جیسے کارٹون مسلط تھے۔ مہنگائی رک نہیں رہی تھی، معیشت ہلنے کا نام نہیں لے رہی تھی۔ اسد عمر اور اسکی سرجری کی پالیسی سے بزنس میں سے لے کر آئی ایم ایف تک سب پریشان تھے۔ مقتدرہ نے زور لگایا اور اپنا بندہ لے آئی لیکن حالات مشکل تھے۔

 کچھ مانگ تانگ کے معاملہ چلا تو کرونا آ گیا۔ خان کی نیت ٹھیک تھی لیکن سر پیر کوئی نہیں تھا۔ میڈیا کی دم پہ پاؤں رکھ دیا، اپوزیشن کو تننے کی کوشش کی، ٹیکس کے لئے بھی زور لگایا لیکن ہر طرف مافیا تھا، کمزور حکومت تھی، کہیں بلیک میل ہوتا، کہیں عزت بچاتا، کہیں یو ٹرن لیتا۔

خان ڈٹا رہا! مستقل مزاجی کے ساتھ لیکن مقتدرہ پر پریشر بڑھ رہا تھا۔ کوئی کہتا سر یہ کیا تبدیلی ہے، نہ گورننس ہے نہ کرپشن پہ کنٹرول۔ بزدار ہے اور فیصل واڈا، شہباز گل ہے اور شہزاد اکبر، خسرو بختیار ہے اور جہانگیر ترین کی شوگر ملز۔ میڈیا کی مس مینجمنٹ سے مسائل اور بھی زیادہ دکھتے تھے۔

پھر خان نے ابسولوٹلی ناٹ کہہ دیا تو میاں صاحب کی تو جیسے چاندی ہو گئی۔ میاں صاحب جن کا غیرت سے دور کا بھی واسطہ نہیں،  چار بار پکڑے گئے الحمدللہ چاروں بار جھکے، پیچھے ہٹے پھر بوٹ پالش کئے اور واپس آ گئے، ایک بار بھی بھٹو کی طرح غیرت نہیں دکھائی سو آج بھی زندہ ہیں اور اگلی باری کے امیدوار۔

مقتدرہ پہلے دن سے اپوزیشن کو سزاؤں اور امریکہ سے پنگے کے خلاف تھی۔ وہ سمجھتے تھے ملک کا وسیع تر مفاد اسی میں ہے۔ نواز شریف اور مریم کو ریلیف بھی اسی لئے ملا۔ خان کے لئے یہی دو اشوز ضروری تھے، اس کی پولیٹیکل ہسٹری انہی نعروں پر تھی، اس نے الیکشن ہی کرپشن پر لڑا تھا۔ مقتدرہ کا زور پرفارمنس پر تھا،  خان بات مانتا نہیں تھا۔

ابسولوٹلی ناٹ پر کسی کو اعتراض نہیں تھا، نعرے لگانے اور شور مچانے پر تھا۔ روس جانے پر سب آن بورڈ تھے لیکن یو این کی قرارداد میں ووٹ پہ اختلاف تھا۔ اور یہ شکوہ کچھ ایسا غلط بھی نہیں ہے کہ خان کے لئے وہ کام بھی کئے گئے جو باقی کسی کے لئے نہیں ہوئے۔ کارکے ہو یا ریکوڈیک، این سی او سی ہو یا لوکسٹ، الیکشن ہو یا کوئی بل، نمبر پورے کرنے ہوں یا کسی کو چپ کروانا، مقتدر حلقے ہمیشہ خان کے ساتھ کھڑے ہوئے۔

مسئلے بڑھتے گئے کیونکہ خان کی پاپولیرٹی گرتی جا رہی تھی۔ بزدار سے پنجاب نہیں سنبھل رہا تھا، اتحادی خوش نہیں تھے لیکن مجبور تھے۔ پھر میاں صاحب نے نام لے کر گالیاں شروع کیں، مولانا نے چیخ چنگھاڑ میں حصہ ڈالا، امریکا بہادر نے بھی ناراضگی ظاہر کرنا شروع کر دی، میاں صاحب نے لندن کی دوائی کا فائدہ اٹھا کے ملنا جلنا شروع کیا۔ اور خان، اپنی سادگی میں، کبھی پرنس کو ناراض کرتا، کبھی کنگ کو، کبھی ترین کو اور کبھی علیم کو، کبھی اتحادیوں کو اور کبھی ان کو لانے والوں کو۔

اندر سے آوازیں بڑھنا شروع ہو گئیں کہ سر یہ تھا نیا پاکستان؟ یہ تھی تبدیلی؟ اوپر سے خان صاحب کی لیڈری کم نہیں ہو رہی تھی۔ وہ کبھی رشین بلاک کی بات کرتا کبھی اگلے چیف کی۔ انہیں سمجھایا گیا کے سر، روس، چین نہیں ہے! ہم ایران نہیں ہیں نہ ہی انڈیا!۔ پہلے اپنا گھر ٹھیک کر لیں، لیکن خان کو کون سمجھا سکتا ہے!

جب مقتدرہ کو لگا کہ خان سمجھ نہیں سکتا، اچھے کام کا کریڈٹ خود لیتا ہے اور گالیاں ہم کھاتے ہیں تو انہوں نے نیوٹرل ہونے کا فیصلہ کیا۔ جن بیساکھیوں پہ خان صاحب تھے، وہ کھینچ لیں اور کہا کے چار قدم خود چل کر دیکھیں۔ چلنا کیا تھا، خان صاحب کھڑے بھی نہ رہ سکے، دھڑام سے گرے۔ غرور اتنا تھا کے جھکے نہیں،اکڑ گئے۔ لیکن!!!

اور اسی لیکن کے بعد اصل بات ہے!!

لیکن ہوا یہ کہ کبے کو لات راس آگئی! خان کی سادگی، بے بسی، لڑنے اور ڈٹ جانے کی قوت، ٹھیک نیت اور کام کی لگن، باطل کے سامنے کھڑے ہونے کی سکت، انجام سے بے پرواہی، خلوص، انکار، للکار، خودداری، غیرت یا جو کچھ بھی تھا وہ عوام کو بھا گیا۔ اور عام عوام بھی نہیں،  پڑھی لکھی عوام، نوجوان، خواتین، بزرگ، گلی محلے والے، کوٹھیوں والے غرض ہر کوئی۔ اور اب؟

‏ اب جو کرتے ہیں الٹا پڑتا ہے۔ جو مرضی کرو، بات بنتی نہیں ہے!!

خان آج بھی مقتدر حلقوں کی چوائس نہیں ہے!

لیکن کیا مقتدرہ عوام کے خلاف جا سکتی ہے؟ کیا عوام کے وسیع تر مفاد میں مشرف سے جان چھڑوانے والے، عوام کی نبض پڑھنے والے جنکی اصل طاقت ہی عوام کی سپورٹ ہے، عوامی جذبات کے خلاف جا سکتے؟ اور اگر جائیں بھی تو آخر کب تک؟ کیا انہوں نے 6 ماہ کا سوچنا ہے صرف؟ نہیں حضور! بلکہ اس کے بعد کا!

 کیا ایک اپائنٹمنٹ تک محدود ہو چکے ہیں وہ؟ دل نہیں مانتا!

  کیا یہ 77 ہے؟ کیا خان بھٹو ہے؟ اور اگر ہو بھی تو، کیا کوئی ضیاء بننا چاہے گا؟ کیا پاکستان اسکا متحمل ہو سکتا ہے؟ کیا پاکستان، خان کو کھو سکتا ہے؟ کیا ملک کسی اور سانحے کا بوجھ سہہ سکتا ہے؟

   جی نہیں حضور!!! جی نہیں!!!

جنرل باجوہ صاحب

السلام علیکم سر!

امید ہے کہ آپ خیریت سے ہوں گے۔ سر کہتے ہیں طاقت کا نشہ سب سے برا ہوتا ہے۔ یہ انسان کو سامنے کی بات بھی نہیں دیکھنے دیتا۔ لیکن مجھے امید ہے کہ آپ دیکھ سکیں گے جو آپ کو دکھانے لگے ہیں۔ ‏سر پاکستان کی کل آبادی کا 65 فیصد نوجوانوں پر مشتمل ہے۔ یہ نوجوان نا تو Uninformed ہیں نا ہی کوئی Bots اور یہ Beggars بھی نہیں ہیں۔

‏سر یہ نوجوان ملک کا مستقبل ہیں اور آج آزمائے ہوئے چوروں اور لٹیروں کے پے رول پر موجود صحافی و دانشور انہیں فاشسٹ کہہ رہے ہیں، انہیں گالیاں دے رہے ہیں۔ کل جب ملک پر کوئی مشکل وقت ہو گا تو یہ صحافی نہیں بلکہ یہ نوجوان پاک فوج کے ساتھ کھڑے ہوں گے۔

‏سر یہ ملک، یہ فوج، یہ معیشت جس تنخواہ دار طبقے کے ٹیکس پر چلتی ہے، جن کے فارن ایکسچینج پر چلتی ہے وہ سب دن دہاڑے اور رات گئے اپنے مینڈیٹ پر ڈاکہ ڈلتے دیکھ کر شدید مضطرب ہیں۔ معاملات اس مقام پر نا جانے دیں جہاں یہ سسٹم سے مایوس ہو جائیں۔ ‏سر خدانخواسطہ اگر یہ نوجوان سسٹم سے مایوس ہو گئے تو خاکم بدہن آپ اس سے پہلے ملک کو پیش آنے والے تمام چیلنجز کو بھول جائیں گے۔ ماضی کے تمام مسائل اور مصائب چھوٹے لگنے لگیں گے۔ اگر آپ پاکستان اور فوج سے محبت کرتے ہیں جو میرا خیال ہے آپ کرتے ہیں تو بڑھیں اور معاملات سنبھالیں۔

‏ہم ہرگز یہ نہیں کہہ رہے کہ آپ عمران خان کو اقتدار میں لے آئیں۔ یہ فیصلہ عوام ہی کریں گے۔ ہم صرف یہ عرض کر رہے ہیں کہ اس قوم کے اجتماعی شور کی توہین نا کی جائے رات گئے عدالتیں کھول کر، ہمارے وزیراعظم کے ہاتھ پاؤں باندھ کر اور ضمیرفروشی کر کے۔ ‏سر یہ دیکھنے کے لیے کوئی آئین سٹائن ہونا ضروری نہیں کہ تحریک عدم اعتماد مسترد ہونے پر کیسے عدلیہ ایکٹو ہوئی اور فلور کراسنگ پر ٹال مٹول سے کام لیتی رہی تا کہ حکومت گر سکے۔ الیکشن کمیشن کیسے صرف تحریک انصاف کی فنڈنگ کے پیچھے پڑا ہے ہمیں نظر آ رہا ہے۔

‏جناب ایک ہوٹل میں ایک بزرگ شہری کو مار پیٹ کر بکاؤ صحافیوں کے ہاتھ اسے "یوتھیا" کہا گیا۔ پھر پاک فوج کے ایک سرونگ میجر کو مار مار کر اس کا بازو توڑ دیا گیا۔ جناب عوام کے آپ سے دور ہونے کی دیر ہے، یہ کرپٹ سیاستدان آپ کو پنجاب پولیس بنانے میں دیر نہیں کریں گے!

‏اللہ کے بعد اس ملک میں ہر طاقت کا سرچشمہ عوام ہیں۔ فوج جتنی مرضی طاقتور ہو اگر عوام اس کے ساتھ نا ہوں تو وہ طاقتور نہیں رہتی۔ سر زرا سوچیں کہ جس قوم اور فوج نے مارشل لا بھگتے، بھٹو کی پھانسی بھگتی، آج اس کے جوان اور فوجی یکساں پریشان اور بے چین کیوں ہیں؟ ‏ہمیں اپنی فوج کے ڈسپلن اور یونٹی آف کمانڈ پر ناز ہے۔ خدا کا واسطہ ہے کہ یہ ناز قائم رہنے دیں۔ بلوچستان، فاٹا وغیرہ میں پہلے ہی حالات ٹھیک نہیں ہیں، ہم اچھے بھلے بنے بنائے ملک کو تباہ کرنے پر کیوں تلے ہیں؟

‏ہم عام پاکستانی یہ یقین رکھتے ہیں کہ ہماری عدلیہ اور ہماری فوج حالات کی سنگینی کا اندازہ لگا کے وہی کرے گی جو کسی بھی محب وطن پاکستانی کو کرنا چاہیے۔ فوری اور منصفانہ انتخابات کا انعقاد! اس کے سوا جو کچھ بھی آپ کریں گے وہ محض مزید نقصان کے بعد پھر الیکشن پر ہی منتج ہو گا۔

‏پاکستان اور پاک فوج دونوں ہمارا غرور تھے اور ہیں۔ براہ مہربانی اس ملک کی روح، اس ملک کے نوجوان کا جذبہ اور امید قتل نا ہونے دیں۔ پاکستان زندہ باد